Правни професионалци, приправници и дипломирани студенти по право присуствуваат на отворената онлајн дискусија за европските и националните стандарди за правна помош и застапување, како и за правата на жртвите на трговија со луѓе, содржани во тие стандарди. На настанот организиран од заедничкиот проект на ЕУ и Советот на Европа за „Спречување и борба против трговијата со луѓе во Северна Македонија“, учесниците се запознаа со Брошурата за правна помош на жртви на трговија со луѓе – клучен ресурс и референтна алатка, развиена да обезбеди информации за положбата и правата на жртвите на трговија со луѓе во судските постапки, за оние кои ги застапуваат жртвите на трговија со луѓе пред судовите.

„Клучно е жртвите на трговија со луѓе да бидат застапувани од добро обучен и искусен адвокат во судските постапки. Добрите адвокати овозможуваат да правата на жртвите, утврдени со европските правни инструменти и националното законодавство целосно се имплементираат. Благодарна сум за поддршката на Советот на Европа за градење на капацитетите на адвокати со цел високо квалитетна одбрана на жртвите на трговија со луѓе“- рече Павлина Зефиќ, истакнат адвокат и обучувач на СнЕ за пристап до надомест на штета за жртвите на трговија со луѓе.

Јелена Ристиќ , ко-автор на брошурата и заменик-претседател на Адвокатската комора ја нагласи важноста на поддршката на ЕУ и Советот на Европа во оваа област преку градење на капацитетите за адвокатите, во соработка со Адвокатската комора.

Во октомври и ноември 2020 година, 80 адвокати, приправници и студенти на постдипломски студии по право ги завршија двата HELP курсеви за борба против трговијата со луѓе. Целта на активностите за градење на капацитетите е да се создаде една база на адвокати кои имаат добри познавања за трговијата со луѓе и кои можат да бидат именувани навремено како правни застапници на жртви на трговија со луѓе во судските постапки.

Наташа Бошкова, ко-автор на брошурата и адвокат на НВО со искуство во правно застапување на жртви на трговија со луѓе, ја истакна важноста на пристапот до бесплатна правна помош за жртвите на трговија со луѓе и надежта дека сите процедурални дилеми поврзани со потврдување на статусот на жртвите ќе бидат наскоро решени од страна на институциите.

Активностите за градење капацитети се организирани во рамките на проектот "Спречување и борба против трговија со луѓе во Северна Македонија", кој е дел од програмата "Хоризонтален инструмент за Западен Балкан и Турција II" на Европската унија / Советот на Европа која има за цел да им помогне на властите во Југоисточна Европа да ги почитуваат стандардите на Советот на Европа и законодавството на Европската унија во рамките на процесот на проширување.