Дванаесет офицери за комуникација на Министерството за внатрешни работи (МВР) и новинари учествуваа во обука насочена кон известување на јавноста, засновано врз родов и сензитивен пристап кон жртвите на трговија со луѓе. Целта на активноста, која е поддржана од Европската Унија и Советот на Европа, е двојна: да се зголемат капацитетите на учесниците за информирање на јавноста за случаите на трговија со луѓе засновано врз перспектива на жртвата и да се стимулира поврзувањето меѓу комуникациските офицери во МВР и новинарите од јавни и приватни медиуми во однос на борбата против трговијата со луѓе.

Меѓу другото, учесниците се запознаа со концептите и терминологијата која би требала да се употребува во јавноста кога таа се информира за случаите на трговија со луѓе, заштитата на приватните податоци на жртвите на трговија со луѓе и разгледуваа етички прашања во однос на илустрирање на сториите со фотографии и видеа. Преку групна работа на студија на случаи, учесниците се ангажираа во подготовка на известување за јавноста за случаи на трговија со луѓе. Преку форум за дискусија се поттикна отворена дебата и размена на искуства помеѓу комуникациските офицери и новинарите.

“Родовата нееднаквост директно придонесува жената да стане жртва. Родовата нееднаквост се манифестира преку целосна зависност и послушност кон таткото, мажот или семејството, преку одговорноста за грижа кон семејството и недостаток од можности за вработување„-вели Наташа Доковска, претставник на Здружението на новинарите за човекови права.

Обуката беше организирана во рамките на проектот “„Зајакнување на активностите против трговија со луѓе во Северна Македонија“, дел од заедничката иницијатива на Европската Унија и Советот на Европа „Хоризонтален инструмент за Западен Балкан и Турција.