Билтенот „Најнови случувања во судската пракса на Европскиот суд за човекови права во областа на слободата на изразување“претставува уникатна алатка за споделување информации за нови трендови и случувања во судската пракса на Европскиот суд за човекови права (ЕСЧП, Судот), и истовремено придонесува кон дополнително подобрување на знаењето во областа на слободата на изразување и слободата на медиумите на правните професионалци/ки од Западен Балкан и пошироко.

Неодамна објавениот Билтен во рамките на заедничката програма на Европската Унија и Советот на Европа, Хоризонтален инструмент 2, претставува анализа на периодот февруари - јули 2021 година, за време на кој период Судот донесе значителен број релевантни пресуди во областа на слободата на изразување и безбедноста на новинар(к)ите. Овие пресуди земаат предвид различни области од членот 10 на Европската конвенција за човекови права (ЕКЧП, Конвенцијата). Пресудите или ги потврдуваат принципите кои се веќе дел од добро познатата судска пракса или ги зајакнуваат, и дополнително ги појаснуваат, веќе поставените стандарди во областа.

Во селектираните пресуди кои се елаборирани во овој Билтен, Судот расправа за пошироките аспекти на слободата на изразување, со посебен фокус на проширување на обемот на членот 10 со цел да се опфатат ненасилните уметнички протести, како манифестација на политички говор; рекламирањето кое придонесува кон јавна дебата на теми од општ интерес и може да се смета за спротивно на јавниот морал и верските вредности; и ограничувањата на слободата на изразување онлајн во случај кога преминува во говор на омраза и повикување на насилство.

Кога станува збор за слобода на медиумите, случаите кои се презентирани ги разгледуваат одговорностите на новинар(к)ите во вршењето на нивната професија и активностите како собирање информации; пристап до информации на теми од јавен интерес и до официјални документ; заштита на новинарските извори во врска со употребата на технологии за следење на комуникациите, и посебно активности за масовно следење; како и вклученост на медиумските куќи во изборните кампањи онлајн.

Севкупно земено, селектираните случаи ја истакнуваат обврската на државите - потписнички на Конвенцијата да се придржуваат кон стандардите на Конвенцијата во согласност со принципот на супсидијарност, додека во некои случаи властите се поттикнати да придонесат кон домашна имплементација на Конвенцијата со преземање општи мерки за зајакнување на постојната правна рамка и за зајакнување на нивните административни и судски пракси, во насока на спречување на појава на слични повреди на слободата на изразување во иднина.

Билтенот е достапен на англиски, албански, босански, македонски, црногорски и српски јазик и истиот е изработен во рамки на заедничката програма на Европската Унија и Советот на Европа „Хоризонтален инструмент за Западен Балкан и Турција 2019-2022“ и регионалниот проект „Слобода на изразување и слобода на медиумите во Југоисточна Европа (ЈУФРЕКС)“.