Комисијата за спречување и заштита од дискриминација направи важен чекор напред во унапредувањето на стратешкото планирање за борба против говорот на омраза и дискриминацијата во Северна Македонија, за време на семинарот со учество на околу 20 членови и технички кадар на Комисијата. Настанот, организиран во Велес од 15 до 17 април, беше поддржан од Европската Унија и Советот на Европа и е дел од тековната соработка и поддршка на Европската Унија и Советот на Европа за зајакнување на напорите на Северна Македонија во справувањето со говорот на омраза и дискриминацијата. Оваа програма е дизајнирана за унапредување на знаењата и капацитетите на јавните службеници за препознавање, справување и спречување на говорот на омраза и дискриминацијата, во согласност со европските добри практики и одлуките на Европскиот суд за човекови права

Семинарот претставуваше и одлична можност за работа на зајакнување на меѓуинституционалната комуникација и стратешкото планирање на Комисијата во нивното секојдневно работење, со цел усвојување поефикасен пристап кон антидискриминациските политики и активности. Во рамки на оваа активност, членовите и техничкиот кадар на Комисијата присуствуваа на интерактивни предавања кои ги опфатија разликите помеѓу слободата на изразување, говорот на омраза и клеветата, како и граѓанската наспроти кривичната одговорност за говорот на омраза и дискриминацијата. Учесниците, исто така, дискутираа и анализираа значајни пресуди на Европскиот суд за човекови права, со цел нивна практична примена во контекстот на Северна Македонија.

Семинарот заврши со сесии за стратешко планирање насочени кон развивање ефективни и применливи стратегии за напорите на Комисијата во борбата против говорот на омраза и дискриминацијата. Учесниците учествуваа и во практични групни вежби, заеднички извлекувајќи заклучоци и подготвувајќи препораки за зајакнување на институционалните одговори и превентивните механизми.

Семинарот беше дел од проектот „Борба против омразата и нетолеранцијата во Северна Македонија“, во рамки на програмата „Хоризонтален инструмент“, кофинансирана од Европската Унија и Советот на Европа. Програмата има за цел да им помогне на јавните институции и на општеството во целина системски да се справуваат со говорот на омраза и дискриминацијата, како и да промовираат разновидност и еднаквост во општеството.