Joint Programme

Horizontal Facility

Министерството за социјална политика, демографија и млади, со поддршка на ЕУ и Советот на Европа, организираше две обуки за антидискриминација наменети за социјални работници и работнички, како и воспитно-образовен кадар и технички персонал од детските градинки низ Северна Македонија. Обуките се одржаа на 29 и 30 декември во Скопје, со учество на 42 учесници и учеснички, и беа насочени кон зајакнување на капацитетите за промоција на еднаквост, инклузија и почитување на различностите уште од најрана возраст, но и препознавање и заштита од дискриминација

Оваа иницијатива ја признава важната улога што ја играат градинките во спречувањето на дискриминацијата и во градењето на еднаквост и инклузија. Важна улога во овој контекст играат социјалните работници кои обезбедуваат социјални услуги и работат со ранливи групи. Преку интерактивни сесии, учесниците беа запознаени со клучните концепти поврзани со дискриминацијата, омразата и нетолеранцијата, како и со нивните правни, социјални и образовни аспекти.

Програмата беше фокусирана на препознавање на дискриминаторско однесување и штетни стереотипи, разбирање на нивното влијание врз развојот на децата, како и на зајакнување на практичните вештини за соодветно реагирање и спречување на дискриминација во секојдневната професионална пракса. Посебно внимание беше посветено на одговорноста на институциите за ран детски развој во создавањето безбедна, инклузивна и поддржувачка средина за сите деца, без оглед на нивната припадност или лични карактеристики.

Овие обуки претставуваат значаен придонес кон континуираните напори за усогласување на националните политики и практики со европските стандарди во областа на човековите права, еднаквоста и недискриминацијата. Тие, исто така, ја потврдуваат заложбата на Министерството за социјална политика, демографија и млади, со поддршка на Европската Унија и Советот на Европа, за градење инклузивни образовни и социјални услуги кои промовираат почитување, достоинство и социјална кохезија уште од најрана возраст.

Обуките беа поддржани од Проектот „Борба против омразата и нетолеранцијата во Северна Македонија“, која се спроведува во рамки на заедничката програма на Европската Унија и Советот на Европа – Хоризонтална програма за Западен Балкан и Турција.