Joint Programme

Horizontal Facility

Во чест на Светскиот ден за борба против трговијата со луѓе, клучните актери во борбата против трговија со луѓе во Северна Македонија ги здружија вложувањата за зајакнување на идентификацијата, упатувањето и заштитата на жртвите деца на трговијата за сексуална експлоатација. Организирана од заедничката акција на Европската Унија и Советот на Европа „Зајакнување на активностите против трговија со луѓе во Северна Македонија“, заедно со граѓанската организација за борба против трговијата со луѓе „Отворена порта/Ла Страда“, дискусијата ги собра претставниците на релевантните институции, корисници и партнери, вклучувајќи ја Националната комисија за борба против трговија со луѓе, Министерството за внатрешни работи, центрите за социјална работа, Министерството за надворешни работи, меѓународни партнери како и граѓанските организации за размена на искуства и унапредување на практични решенија.

Трговијата со деца со цел сексуална експлоатација е една од најтешките кривични дела, со долгорочни последици по психофизичкиот развој на детето и нарушување на достоинството на жртвите деца. Додека социо-економските и семејни услови негативно влијаат врз ранливоста на децата, во современиот свет, децата се изложени и на ризици од социјалните мрежи и видео игрите.

Со цел да се одговори на овие ризици и да се обезбеди соодветна заштита на децата од трговијата за сексуална експлоатација, граѓанската организација Отворена порта/Ла Страда поттикна експертска дискусија за финализирање на Водичот за постапување со жртви на трговија со деца за сексуална експлоатација. Овој мултисекторски Водич подробно ги објаснува чекор по чекор сите важни фази на откривање, идентификација, упатување, заштита и ресоцијализација на децата жртви на трговијата со луѓе.

„Националните статистики постојано покажуваат дека повеќето од идентификуваните жртви на трговија со луѓе се деца, а сексуалната експлоатација останува најчеста форма на експлоатација. Меѓутоа, мора да запомниме дека зад статистиката постои вистинско дете, чии права се прекршени и на кое му треба заштита, поддршка и можност да го обнови својот живот“, рече Марија ТОДОРОВСКА, програмски директор на граѓанската организација Отворена порта/Ла Страда.

Настанот создаде форум за дискусија на експерти кои ги споделија своите различни професионални гледишта за превенција и борба против детска трговија за сексуална експлоатација. Со нивните заеднички напори, тие имаат за цел да придонесат за намалување на бројот на жртви на детска трговија и да ги истражат можностите за унапредување на правната и психосоцијалната заштита на децата во ризик.

Акцијата „Зајакнување на активностите против трговија со луѓе во Северна Македонија “ е дел од заедничката иницијатива на Европската Унија и Советот на Европа „Хоризонтален инструмент за Западен Балкан и Турција“.