Joint Programme

Horizontal Facility

Дваесет и пет адвокати од Северна Македонија беа активно вклучени во дводневна обука фокусирана на обезбедување бесплатна правна помош и обезбедување висококвалитетна правна поддршка фокусирана на жртвите на трговија со луѓе. Заедничките проекти на ЕУ и на Совет на Европа "За консолидиран и поефикасен систем за бесплатна правна помош (БПП) во Северна Македонија” и “Зајакнување на активностите против трговија со луѓе во Северна Македонија” во партнерство со Адвокатската комора и нејзиниот неодамна формиран Едукативен центар, ја спроведоа оваа обука, фокусирајќи се на различни аспекти на квалитетно обезбедување бесплатна правна помош и правна заштита на жртвите на трговија со луѓе во согласност со европските стандарди. Активноста имаше за цел да ги информира и прошири знаењата на адвокатите за „Законот за исплата на паричен надоместок на жртви од кривични дела со насилство“, кој стапи на сила во мај 2023 година и „Законот за бесплатна правна помош“, донесен во 2019 година.

На обуката, учесниците стекнаа вредни сознанија за бесплатната правна помош преку практични вежби и студии на случај, ефикасно применувајќи ги теоретските концепти во сценарија од реалниот живот. Оваа обука беше базирана на наставните програми развиени од консултантите на Советот на Европа во 2023 година и беше водена од тројца искусни обучувачи, од кои сите ја имаа завршено интензивната Програма за обука за обучувачи во јануари и февруари 2024 година, поддржана од програмата Horizontal Facility III.

„Пристапот до правда е фундаментално човеково право за секој човек и основен принцип на владеењето на правото во едно општество. Во отсуство на пристап до правда, луѓето не се во можност да ги остварат своите права, да се борат против дискриминација или да бараат одговорност од носителите на одлуки“, рече Јована Малезанска, адвокат и еден од обучените обучувачи.

На обуката, учесниците ги зајакнаа нивните вештини во однос на Европските стандарди за борба против трговија со луѓе, содржани во Конвенцијата на Советот на Европа за акција против трговијата со луѓе и судската пракса на Европскиот суд за човекови права.  „Конвенцијата на Советот на Европа е клучен мултилатерален документ, кој ги пропишува стандардите за борба против трговијата со луѓе во европскиот регион. Нејзиниот пристап фокусиран на жртвата е особено важен за заштита на човековите права на жртвите на трговија со луѓе од страна на адвокатите и обезбедување на навремена и квалитетна бесплатна правна помош“, изјави Ирена Здравкова, раководител на програмата во граѓанската организација „Македонско здружение на млади правници“ (МЗМП) и член на мобилниот тим за борба против трговијата со луѓе во Тетово.

Учесниците покажаа голем интерес да дознаат повеќе за кривичното дело трговија со луѓе, неговите клучни елементи и како да се примени пристапот со сензитивност за траумата при застапување и интервјуирање на жртви на трговија со луѓе.

На посебна сесија беа наведени чекорите за пополнување на барањата за компензација од државата во име на жртвите на насилни кривични дела. Вешти обучувачи од Адвокатската комора и од организациите на граѓанското општество МЗМП и „За среќно детство“ применија интерактивни методологии за учење за возрасни и интегрираа играње улоги и работење во групи врз основа на случаи на трговија со луѓе.

Оваа активност за градење на капацитетите беше организирана во соработка со Адвокатската комора на Северна Македонија, од страна на проектите “За консолидиран и поефикасен систем за бесплатна правна помош (БПП) во Северна Македонија” и “Зајакнување на активностите против трговија со луѓе во Северна Македонија”, кои се дел од заедничката иницијатива на Евроспката Унија и на Совет на Европа, “Horizontal Facility за Западен Балкан и Турција”.