Ndërsa Shqipëria avancon në rrugën e saj drejt anëtarësimit në Bashkimin Evropian, përafrimi i legjislacionit mediatik me standardet evropiane përbën një hap thelbësor. Në këtë kontekst, Autoriteti i Mediave Audiovizive (AMA) mori pjesë në një seminar për ngritjen e kapaciteteve, të përqendruar në transpozimin dhe zbatimin e Aktit Evropian për Lirinë e Medias (EMFA) dhe Aktit të Shërbimeve Digjitale (DSA).

Seminari, i zhvilluar në kuadër të veprimit të përbashkët të Bashkimit Evropian dhe Këshillit të Evropës PROFREX, bëri bashkë stafin e AMA-s, përfaqësues të qeverisë dhe ekspertë ndërkombëtarë për të shqyrtuar mënyrat e integrimit efektiv të EMFA-s dhe DSA-s në legjislacionin kombëtar. Diskutimet u përqendruan në përmirësimin e mbikëqyrjes rregullatore në hapësirën digjitale dhe sigurimin e transparencës dhe pavarësisë redaktoriale.

Pjesëmarrësit thelluan njohuritë mbi dispozitat kyçe të EMFA-s dhe DSA-s, përfshirë transparencën e pronësisë mediatike, mbrojtjen e përmbajtjes online, detyrimet për platformat digjitale dhe rëndësinë e forcimit të autonomisë dhe kapaciteteve zbatuese të AMA-s. Si rezultat i ushtrimeve praktike në grup, pjesëmarrësit hartuan një plan veprimi për të adresuar boshllëqet ligjore dhe për të përcaktuar hapat e ardhshëm në procesin e transpozimit.

Në përfundim të seminarit, stafi i AMA-s u pajis me mjete konkrete, njohuri krahasimore dhe rekomandime të zbatueshme për të mbështetur përpjekjet për reformën e medias, si pjesë e rrugëtimit të Shqipërisë drejt integrimit evropian. Aktiviteti rikonfirmoi rolin qendror të AMA-s në mbrojtjen e lirisë dhe pluralizmit të medias në një mjedis audioviziv dhe digjital që është në zhvillim të vazhdueshëm.

Ky seminar u organizua nga Divizioni për Bashkëpunim për Lirinë e Shprehjes dhe projekti “Mbrojtja e Lirisë së Shprehjes dhe e Medias në Shqipëri”, pjesë e programit të përbashkët të Bashkimit Evropian dhe Këshillit të Evropës “Instrumenti Horizontal për Ballkanin Perëndimor dhe Turqinë”.