„Можност или експлоатација “– кампањата која ги објаснува проблемите со трговијата со луѓе заради трудова експлоатација на млади и невработени лица, отпочна во Северна Македонија. Иницијативата за подигање на свеста ќе продолжи до 31 октомври и има за цел да ја спречи трговијата со луѓе преку предупредување на јавноста и ранливите групи за постоење на лажни огласи за вработување / регрутирање преку измама со цел експлоатација.
Поддржана од страна на програмата на ЕУ и на Советот на Европа - Хоризонтален инструмент, а имплементирана од страна на НВО Отворена Порта, членка на меѓународната мрежа за борба против трговија со луѓе Ла Страда , кампањата има посебен фокус на тоа како да се препознаат лажни понуди при потрага по работа во земјата и во странство.
„ Постепено ќе објавуваме на социјалните медиуми и ќе емитуваме материјали за подигање на јавната свест, кои ќе вклучуваат видеа на македонски и англиски јазик, информации за ризиците од трговија со луѓе заради трудова експлоатација, избрани дизајни на постери кои овозможуваат визуелизација на феноменот и јасни упатства за тоа како да се заштитиме себе си од трговија со луѓе заради трудова експлоатација “- рече Стојне Димишковска , претставник на невладината организација Отворена порта.
Кампањата за подигање на јавната свест "Можност или експлоатација", имплементирана од страна на Отворена порта , е поддржана преку грант во рамките на проектот „Спречување и борба против трговијата со луѓе во Северна Македонија“. Овој проект е дел од заедничката програма на Европската унија / Советот на Европа „Хоризонтален инструмент за Западен Балкан и Турција 2019 - 2022“.