Првиот состанок на работната група за јакнење на централната координација за здравствена заштита во казнено-поправните установи (КПУ) во Северна Македонија се одржа на 5-6 март 2024 година, со учество на високи претставници на Министерството за здравство, Фондот за здравствено осигурување, Управата за извршување на санкции, како и Здравствениот дом Скопје кој го покрива КПУ Идризово како најголемиот затвор.

Со поддршка на ЕУ и Советот на Европа, преку овој состанок се спроведуваат заклучоците од дискусијата на високо ниво, која се реализираше во октомври 2023 година, каде беа вклучени и министерот за здравство и заменик министерката за правда, со цел унапредување на соработката и координацијата на релевантните чинители за обезбедување подобри здравствени услуги во затворите на Северна Македонија. Следствено, во декември 2023 год, Министерството за здравство ја основа работната група, како преодна мерка за координација на здравствената заштита во КПУ. 

Освен процедурите кои го регулираат работењето на оваа работна група, учесниците дискутираа за конкретните чекори со кои се зајакнуваат постојните поттикнувања за вработување на здравствени работници во КПУ, поврзување на сите амбуланти на КПУ во рамките на националниот систем за е-здравство, унифицирање на механизмот за обезбедување лекарства, како и адресирање на неопходните законски измени преку појаснување на одредбите за примарна и секундарна здравствена заштита.

Овие активности го поддржуваат и олеснуваат спроведувањето на Националната стратегија за развој на пенитенцијарниот систем во Република Северна Македонија (2021-25).

Преку обезбедување на институционална поддршка и градење капацитети, проектот  „Јакнење на капацитетите на пенитенцијарниот систем во Северна Македонија” кој се спроведува во рамките на заедничката програма на ЕУ и Советот на Европа  Хоризонтален инструмент за Западен Балкан и Турција, останува една од клучните иницијативи за поддршка на здравствената заштита во казнено-поправните установи на земјата.