Si do ta përshkruanit reformën vijuese në Agjencinë Shtetërore të Kadastrës në Shqipëri?

Në Agjencinë Shtetërore të Kadastrës, ne kemi ndërmarrë një reformë strukturore dhe transformuese që synon modernizimin e administrimit të pronës në Shqipëri. Për herë të parë, nuk jemi fokusuar vetëm në përmirësime të pjesshme, por në adresimin e problemeve themelore që kanë shoqëruar sistemin kadastral ndër vite.

Fokusi ynë është ndërtimi i një kadastre moderne, të digjitalizuar dhe të besueshme, nëpërmjet dy proceseve themelore: digjitalizimi i plotë i arkivës kadastrale dhe përfundimi i regjistrimit fillestar të pronave në të gjithë territorin. Këto procese janë parakushte për garantimin e sigurisë juridike të pronës dhe për ofrimin e shërbimeve me cilësi më të lartë për qytetarët. Në këtë rrugëtim, bashkëpunimi me partnerët evropianë ka qenë thelbësor për adoptimin e praktikave më të mira ndërkombëtare dhe për mbështetjen e integrimit të Shqipërisë në Bashkimin Evropian. Rezultatet tashmë janë të dukshme në rritjen e shërbimeve online, transparencë më të madhe dhe besim në rritje nga publiku ndaj institucionit.

Nga këndvështrimi institucional, cilat kanë qenë disa nga sfidat kryesore gjatë procesit të reformës dhe si ka ndihmuar partneriteti me BE-në dhe Këshillin e Evropës në adresimin e tyre?

Puna jonë e përditshme shoqërohet me sfida të rëndësishme që lidhen me trashëgiminë e problemeve historike të pronës, modernizimin e infrastrukturës digjitale dhe ndryshimin e kulturës institucionale drejt një qasjeje më të orientuar ndaj qytetarit.

Disa nga sfidat kryesore përfshijnë mungesën e arkivave të plota, harta kadastrale të dëmtuara ose të pasakta, zbatimin jo uniform të standardeve të regjistrimit të pronës në periudha të ndryshme kohore, si dhe përfundimin e proceseve kalimtare si legalizimi, trajtimi i shtëpive të vjetra dhe kalimi i tokës bujqësore në pronësi.

Partneriteti me Bashkimin Evropian, Këshillin e Evropës dhe partnerë të tjerë ndërkombëtarë ka qenë i vlefshëm për adresimin e këtyre sfidave përmes asistencës teknike, shkëmbimit të përvojave dhe forcimit të kapaciteteve profesionale të stafit.
Këshilli i Evropës ka qenë një partner i rëndësishëm në forcimin e transparencës dhe integritetit institucional.

Më konkretisht, cilat janë fushat kryesore të bashkëpunimit me Këshillin e Evropës dhe si kanë ndikuar këto përpjekje në reformën e Kadastrës?

Bashkëpunimi me Këshillin e Evropës ka qenë i rëndësishëm në avancimin e reformave. Programi i përbashkët i BE-së dhe Këshillit të Evropës “Instrumenti Horizontal” është fokusuar në disa fusha kyçe për përmirësimin e funksionimit të institucionit dhe rritjen e transparencës.

Për herë të parë, është hartuar një Strategji Komunikimi për Kadastrën Shqiptare, e shoqëruar me një plan konkret veprimi. Kjo strategji mundëson komunikim më proaktiv me qytetarët dhe përfshirje më të madhe të palëve të interesuara, duke ndërtuar besim dhe bashkëpunim me pronarët dhe publikun.

Gjithashtu, fushatat ndërgjegjësuese në bashkëpunim me Këshillin e Evropës kanë dhënë rezultate shumë të mira, duke informuar qytetarët për të drejtat dhe detyrimet e tyre si pronarë. Materialet informuese mbulojnë procese si regjistrimi, legalizimi dhe digjitalizimi, me qëllim edukimin e publikut.

Konferenca e ardhshme Rajonale mbi të drejtën e pronës do të shërbejë si platformë bashkëpunimi dhe shkëmbimi përvojash në nivel rajonal.
 

Si janë integruar standardet evropiane dhe dokumentet e Këshillit të Evropës në reformën e Kadastrës?

ASHK-ja ka bërë përparim të konsiderueshëm në rritjen e efikasitetit dhe transparencës, përmes përfundimit të procesit të digjitalizimit, të regjistrimit fillestar dhe automatizimit të shërbimeve.

Rritja e transparencës dhe reduktimi i ndërhyrjes njerëzore përmes automatizimit dhe përdorimit të teknologjive të reja (si teknologjia blockchain) përputhen me standardet evropiane dhe përfaqësojnë një hap të rëndësishëm në luftën kundër korrupsionit.

Gjithashtu, hartimi i Planit të Integritetit dhe Planit Antikorrupsion të ASHK-në, edhe me mbështetjen e BE-së, janë pjesë e integrimit të standardeve të mirëqeverisjes në punën e përditshme.

Cili është vizioni juaj strategjik për të ardhmen e institucionit?

Vizioni ynë është ndërtimi i një kadastre modern, të digjitalizuar dhe plotësisht të besueshme, e cila garanton siguri juridike për pronarët dhe ofron shërbime të shpejta dhe transparente për qytetarët.

Deri në vitin 2026, synojmë të përfundojmë digjitalizimin e plotë të arkivës kadastrale dhe deri në 2027, regjistrimin fillestar të pronave në të gjithë territorin. Rritja e automatizimit të shërbimeve dhe përmirësimi i komunikimit me qytetarët gjithashtu do të rrisë besimin ndaj institucionit.

Të gjitha këto përpjekje synojnë krijimin e një kadastre moderne, transparente dhe të besueshme, që kontribuon në zhvillimin ekonomik dhe social të vendit, me mbështetjen e vazhdueshme të BE-së dhe Këshillit të Evropës.