Takimi i Komitetit Drejtues të Përfituesve të programit “Instrumenti Horizontal për Ballkanin Perëndimor dhe Turqinë” (Instrumenti Horizontal III) theksoi rëndësinë strategjike të partneritetit midis Bashkimit Evropian dhe Këshillit të Evropës në mbështetjen e përpjekjeve të vazhdueshme të reformave në Shqipëri, veçanërisht në përputhjen me kërkesat e anëtarësimit në Bashkimin Evropian.
Përfaqësues nga BE-ja, Këshilli i Evropës dhe institucionet shqiptare u mblodhën sot në Tiranë për të vlerësuar progresin e programit, bashkërenduar mbështetjen dhe dakordësuar për hapat e ardhshëm. Institucionet e Shqipërisë ritheksuan angazhimin e tyre për të garantuar suksesin afatgjatë të këtyre reformave, të cilat do të vazhdojnë të nxisin procesin e integrimit evropian të vendit.
Megi Fino, Zëvendës-Ministër për Evropën dhe Punët e Jashtme, ritheksoi rolin thelbësor të avancimit të axhendës së reformave të Shqipërisë dhe procesit të anëtarësimit në BE, siç pasqyrohet në rekomandimet e organeve monitoruese të Këshillit të Evropës. Ajo nënvizoi kontributin kyç të Instrumentit Horizontal III për reformat në fusha si drejtësia, mbrojtja e të drejtave të njeriut, lufta kundër korrupsionit dhe diskriminimit. “Procesi i integrimit në BE nuk ka të bëjë vetëm me plotësimin e kritereve teknike, por me garantimin që reformat të jenë të rrënjosura thellë në institucionet tona”, theksoi ajo.
Ritva Heikkinen, Shefe e Bashkëpunimit në Delegacionin e BE-së në Shqipëri, përgëzoi progresin e Shqipërisë në rrugën e saj të integrimit në BE, duke deklaruar “Bisedimet e anëtarësimit të Shqipërisë kanë avancuar shumë shpejt këtë vit dhe të gjitha kapitujt e negociatave janë tashmë të hapur. Kapitujt 23 dhe 24 mbi gjyqësorin, të drejtat themelore, drejtësinë, lirinë dhe sigurinë janë boshti i të gjithë procesit nga fillimi deri në fund. Ne jemi të angazhuar të mbështesim Shqipërinë në përmbushjen e kritereve në këta kapituj kyç, përfshirë edhe përmes programit tonë të përbashkët me Këshillin e Evropës.”
Claus Neukirch, Drejtor i Drejtorisë së Koordinimit të Programeve në Këshillin e Evropës, vuri në dukje: “Ndërsa Shqipëria shënon 30 vjet anëtarësim në Këshillin e Evropës, ne jemi jashtëzakonisht krenarë për rolin tonë aktiv në formësimin e reformave dhe vendosjen e themeleve për një të ardhme më të fortë evropiane. Instrumenti Horizontal ka qenë thelbësor në këtë rrugëtim, duke vendosur të drejtat e qytetarëve në qendër të këtyre reformave.”
Takimi u përqendrua në sfidat kryesore të hasura në zbatimin e projekteve të Instrumentit Horizontal III. Së bashku ato përfaqësojnë një përpjekje të rëndësishme për të përmirësuar efikasitetin gjyqësor, për të mbrojtur të drejtat e njeriut, për të luftuar krimin ekonomik, për të përmirësuar të drejtat e pronësisë, për të luftuar diskriminimin dhe për të garantuar lirinë e medias në Shqipëri, duke vendosur një bazë të fortë për reformat e ardhshme të qeverisjes.
Disa nga arritjet kyçe përfshijnë:
• Rritjen e efikasitetit gjyqësor përmes forcimit të mbledhjes dhe analizës së të dhënave për institucionet gjyqësore shqiptare.
• Prezantimin e Terapisë të Bazuar në Trauma për grate e dënuara, së bashku me përmirësimin e aftësive të Drejtorisë së Përgjithshme të Burgjeve, lidhur me sigurinë dhe rehabilitimin.
• Forcimin e kapaciteteve të magjistratëve për të hetuar korrupsionin, pastrimin e parave dhe krimin e organizuar duke respektuar të drejtat e njeriut.
• Ndihmë ofruar Kuvendit në hartimin e një Plani Veprimi për Qeverisjen e Mirë, Anti-Korrupsionin dhe Sundimin e Ligjit, duke përfshirë legjislacion të ri për lobimin dhe reforma në financimin e partive politike.
• Ndryshimet në Ligjin nr. 133/2015 ndihmuan në adresimin e prapambetjeve të kompensimit të pronës.
• Legjislacioni kundër diskriminimit i rishikuar në përputhje me direktivat e BE-së dhe standardet e Këshillit të Evropës.
• Nisma për edukimin mediatik dhe kundër gjuhës së urrejtjes, të organizuara me Aleancën kundër Urrejtjes, autoritetet rregullatore të medias dhe shoqërinë civile, me synim luftimin e dezinformimit.
• Forcimin e bashkëpunimit institucional për të rritur sigurinë e gazetarëve përmes protokolleve të përmirësuara për policinë dhe gjyqësorin.
Instrumenti Horizontal III është një nismë e përbashkët e Bashkimit Evropian dhe Këshillit të Evropës, që zbatohet nga viti 2023 deri në 2026. Ajo mbështet përpjekjet e rajonit për të realizuar axhendat e reformave në fushat e të drejtave të njeriut, sundimit të ligjit dhe demokracisë, në përputhje me standardet e BE-së, si dhe luan një rol thelbësor në procesin e anëtarësimit të Shqipërisë në BE.
Për më shumë informacion, ju lutemi kontaktoni:
Besnik Baka, tel. +355 69 21 78 430
MERR TË REJAT MË TË FUNDIT
Flickr
Faqe e kufizuar 
