Back Shqipëria intensifikon përpjekjet për të përmbushur standardet evropiane për median dhe shërbimet dixhitale

Tiranë, Shqipëri 4 mars 2026
  • Diminuer la taille du texte
  • Augmenter la taille du texte
  • Imprimer la page
  • Imprimer en PDF
Shqipëria intensifikon përpjekjet për të përmbushur standardet evropiane për median dhe shërbimet dixhitale

Teksa Shqipëria përparon me përafrimin e kuadrit ligjor me standardet evropiane, përfshirë Aktin për Shërbimet Dixhitale (DSA), përfaqësues të Këshillit të Evropës, Bashkimit Evropian dhe Autoritetit të Mediave Audiovizive të Shqipërisë (AMA) u mblodhën në Tiranë për të diskutuar dispozita thelbësore mbi transparencën, mbrojtjen e përdoruesve dhe mbikëqyrjen rregullatore.

Aktiviteti u organizua në vijim të tryezës së rrumbullakët të organizuar më herët këtë vit. Në aktivitet u prezantua një analizë krahasuese e Këshillit të Evropës e cila identifikon boshllëqet rregullatore dhe jep rekomandime për ndërhyrje të synuara me qëllim pajtueshmërinë e plotë me acquis evropiane. Temat kryesore përfshinë përgjegjësinë e platformave, kërkesat për raportim dhe bashkëpunimin me autoritetet publike.

Gjatë diskutimeve pjesëmarrësit theksuan rëndësinë e transpozimit efektiv të dispozitave të DSA-së në kuadrin ligjor shqiptar në kontekstin e reformave të vazhdueshme për sektorin e medias, si dhe përpjekjeve më të gjera të Shqipërisë për të harmonizuar legjislacionin me standardet evropiane. Në përfundim të takimit, pjesëmarrësit dakordësuan një udhërrëfyes mbi hapat e radhës për të përparuar pajtueshmërinë rregullatore me standardet evropiane. Këto përfshijnë: vendosjen e procedurave të thjeshta për raportimin dhe heqjen e përmbajtjes së paligjshme (notice-and-action), mandatimin e sistemeve të brendshme të trajtimit të ankesave për platformat online dhe forcimin e mbrojtjes për të miturit.

Akti për Shërbimet Dixhitale (DSA) vendos rregulla për shërbimet online që përdoren nga qytetarët evropianë në jetën e tyre të përditshme, përfshirë tregjet online, rrjetet sociale, dyqanet e aplikacioneve, dhe platformat për udhëtime apo akomodim online. DSA ndihmon për të bërë mjedisin online të sigurt dhe të besueshëm.

Ky aktivitet u organizua nga Divizioni për Bashkëpunim për Lirinë e Shprehjes, në kuadër të projektit të përbashkët të Bashkimit Europian dhe Këshillit të Europës Mbrojtja e Lirisë së Shprehjes dhe e Medias në Shqipëri (PROFREX-A), si pjesë e programit të përbashkët të Bashkimit Evropian dhe Këshillit të Evropës Instrumenti Horizontal për Ballkanin Perëndimor dhe Turqinë.

 

 

 

Instrumenti Horizontal III

Programi i përbashkët i Bashkimit Evropian dhe Këshillit të Evropës “Instrumenti Horizontal për Ballkanin Perëndimor dhe Turqinë” (Instrumenti Horizontal III) është një iniciativë bashkëpunimi, që zgjat nga viti 2023 deri në vitin 2026. Programi mbulon projektet në Shqipëri, Bosnjë dhe Hercegovinë, Kosovë*, Mal të Zi, Maqedoninë e Veriut, Serbi dhe Turqi. Ai u mundëson përfituesve të përmbushin axhendat e tyre të reformave në fushat e të drejtave të njeriut, sundimit të ligjit dhe demokracisë dhe të jenë në përputhje me standardet evropiane, që është gjithashtu një prioritet për procesin e zgjerimit të BE-së.

Buxheti i këtij programi arrin në rreth 41 milionë euro (85% financuar nga BE, 15% nga KiE).

* Ky përkufizim është pa paragjykim ndaj qëndrimeve për statusin, dhe është në përputhje me Rezolutën e Këshillit të Sigurimit të Kombeve të Bashkuara 1244/1999 dhe Opinionin e GJND-së mbi shpalljen e pavarësisë së Kosovës.